കൽപ്പറ്റ കാലാവസ്ഥാ വ്യതിയാനവും അതിശക്തമായ സൂപ്പർ എൽനിനോ പ്രഭാവവും മൂലം കേരളത്തിൽ പൊതുവെ കടുത്ത മഴക്കുറവ് അനുഭവപ്പെടുന്ന സാഹചര്യത്തിൽ, വയനാട് ജില്ലയിലെ കിഴക്കൻ പ്രദേശമായ പുൽപ്പള്ളി ഗ്രാമപഞ്ചായത്തിലും ഗുരുതരമായ ജലക്ഷാമം രൂപപ്പെട്ടിരിക്കുകയാണ്. ജൂൺ മാസത്തിൽ തെക്കുപടിഞ്ഞാറൻ മൺസൂൺ ദുർബലമായതോടെ പഞ്ചായത്തിൽ കടുത്ത വരൾച്ച അനുഭവപ്പെടുകയാണ്. സെപ്റ്റംബർ മാസത്തിലും രൂക്ഷമായ കുടിവെള്ള ക്ഷാമം നിലനിന്നിരുന്നു. ഈ സാഹചര്യത്തിൽ പുൽപ്പള്ളി ഗ്രാമപഞ്ചായത്തിനെ വരൾച്ചാബാധിത പ്രദേശമായി പ്രഖ്യാപിക്കണമെന്നാവശ്യപ്പെട്ട് പഞ്ചായത്ത് അധികൃതർ സർക്കാരിന് നിവേദനം നൽകിയിട്ടുണ്ട്.
സംസ്ഥാന ദുരന്ത നിവാരണ അതോറിറ്റി ചെയർമാൻ കൂടിയായ മുഖ്യമന്ത്രിക്ക് അയച്ച കത്തിൽ കൃഷി മന്ത്രിക്കും ജില്ലാ കളക്ടർക്കും പകർപ്പ് നൽകിയിട്ടുണ്ട്. നെല്ല്, ക്ഷീരമേഖല, തോട്ടവിള മേഖലകൾ എന്നിവയുൾപ്പെടെ എല്ലാ ബാധിത സമൂഹങ്ങൾക്കും ഉടൻ ദുരിതാശ്വാസം ഉറപ്പാക്കണമെന്ന ആവശ്യവും പഞ്ചായത്ത് ഉന്നയിക്കുന്നു. ഹ്യൂം സെന്റർ ഫോർ ഇക്കോളജിയുടെ വെതർ ലാബുമായി ചേർന്ന് ശേഖരിച്ച കാലാവസ്ഥാ വിവരങ്ങൾ പ്രകാരം തെക്കുപടിഞ്ഞാറൻ മൺസൂണിൽ 47 ശതമാനം മഴക്കുറവാണ് രേഖപ്പെടുത്തിയിരിക്കുന്നത്. വരൾച്ചാ പ്രഖ്യാപനത്തിനായുള്ള കേന്ദ്ര മാനദണ്ഡങ്ങൾ പ്രകാരം 25 ശതമാനത്തിൽ കൂടുതൽ മഴക്കുറവ് ഉണ്ടായാൽ തന്നെ വരൾച്ച പ്രഖ്യാപിക്കാമെന്ന് ഗ്രാമപഞ്ചായത്ത് പ്രസിഡന്റ് ബിന്ദു പ്രകാശ് പറഞ്ഞു.
ഐഎംഡിയുടെ ചരിത്രപരമായ കണക്കുകൾ പ്രകാരം പുൽപ്പള്ളി പഞ്ചായത്തിലെ ശരാശരി വാർഷിക മഴ 1522.57 മില്ലിമീറ്ററാണ്. സാധാരണഗതിയിൽ തെക്കുപടിഞ്ഞാറൻ മൺസൂണിലും തുടർന്നുള്ള മാസങ്ങളിലും പുൽപ്പള്ളിയിൽ താരതമ്യേന ഭേദപ്പെട്ട അളവിൽ മഴ ലഭിക്കേണ്ടതുണ്ട്. എന്നാൽ ഈ വർഷം ഒക്ടോബർ മാസത്തോടെ മഴ ഏതാണ്ട് പൂർണ്ണമായും നിലച്ചിരിക്കുന്നു. ഈ കാലയളവിൽ ലഭിച്ച മൊത്തം മഴയുടെ അളവ് പരിശോധിക്കുമ്പോൾ, സാധാരണ ലഭിക്കേണ്ട മഴയുമായി താരതമ്യം ചെയ്യുമ്പോൾ ഏകദേശം 65 ശതമാനത്തോളം കുറവ് രേഖപ്പെടുത്തിയിരിക്കുന്നു. ഈ കടുത്ത മഴക്കുറവും തുടർച്ചയായ വരൾച്ചാ ദിനങ്ങളും ചേർന്ന് പുൽപ്പള്ളി പഞ്ചായത്തിലെ കാർഷിക മേഖലയെയും ജനജീവിതത്തെയും കടുത്ത പ്രതിസന്ധിയിലാക്കിയിരിക്കുകയാണ്.
പാംബ്രയിൽ കഴിഞ്ഞ 16 വർഷമായി ശേഖരിച്ച പ്രാദേശിക കാലാവസ്ഥാ വിവരങ്ങളും മഴയുടെ വ്യതിയാനങ്ങൾ വ്യക്തമാക്കുന്നു. ഈ കണക്കുകൾ പ്രകാരം പാംബ്രയിലെ ശരാശരി വാർഷിക മഴ 980 മില്ലിമീറ്ററാണ്. ഈ കാലയളവിൽ ഏറ്റവും കൂടുതൽ മഴ ലഭിച്ചത് 2018-ലാണ്. അന്ന് 1381 മില്ലിമീറ്റർ മഴ രേഖപ്പെടുത്തി. ഏറ്റവും കുറവ് മഴ രേഖപ്പെടുത്തിയത് 2016-ലാണ്; 631 മില്ലിമീറ്റർ മാത്രമാണ് അന്ന് ലഭിച്ചത്. 2026 ജനുവരി മുതൽ ഒക്ടോബർ വരെയുള്ള കാലയളവിൽ പാംബ്രയിൽ ആകെ 881.3 മില്ലിമീറ്റർ മഴയാണ് ലഭിച്ചത്. ദീർഘകാലത്തെ പ്രാദേശിക മഴയുടെ കണക്കുകൾക്കൊപ്പം ഈ വർഷത്തെ വിവരങ്ങളും പരിശോധിക്കുമ്പോൾ പ്രദേശത്തെ മഴയുടെ അളവിലുണ്ടാകുന്ന വ്യതിയാനങ്ങൾ മനസ്സിലാക്കാൻ സാധിക്കും.
പ്രാദേശികമായി ശേഖരിക്കപ്പെട്ട ജനകീയ കാലാവസ്ഥാ വിവരങ്ങളും പുൽപ്പള്ളിയുടെ പ്രതിസന്ധി ആവർത്തിക്കുന്നു. 2022-ൽ ഈ പ്രദേശത്ത് മാരകമായ രീതിയിൽ മഴക്കുറവ് അനുഭവപ്പെട്ടിരുന്നു. ഏപ്രിൽ, മെയ് മാസങ്ങളിൽ മഴ ഏറെക്കുറെ പൂർണ്ണമായും ഇല്ലാതിരുന്നതും (മെയ് മാസത്തിൽ 75.4 മില്ലിമീറ്റർ മാത്രം), ജൂൺ മാസത്തിൽ വെറും 54 മില്ലിമീറ്റർ മഴ മാത്രം ലഭിച്ചതും കർഷകരെ കടുത്ത പ്രതിസന്ധിയിലാക്കി. ആ വർഷം ഏറ്റവും കൂടുതൽ വരൾച്ചാ ദിനങ്ങൾ രേഖപ്പെടുത്തിയത് ഇവിടെയായിരുന്നു. ഈ സാഹചര്യം 2026-ലും ആവർത്തിക്കുകയാണ്. ജൂൺ മാസത്തിൽ മൺസൂൺ ദുർബലമായതോടെ, പുൽപ്പള്ളിയിലെ നെൽക്കൃഷിയിടങ്ങളും മറ്റ് കാർഷിക മേഖലകളും വരണ്ടുണങ്ങി. കുടിവെള്ള സ്രോതസ്സുകളായ കിണറുകളും നീരുറവകളും വറ്റിത്തുടങ്ങിയതോടെ ജനജീവിതം ദുസ്സഹമായി മാറിയിരിക്കുന്നു. സെപ്റ്റംബർ മാസത്തിലും കടുത്ത ജലക്ഷാമം തുടരുന്ന സാഹചര്യത്തിൽ, കാലിത്തീറ്റയുടെ ലഭ്യതയും കുറഞ്ഞിട്ടുണ്ട്.
താപനിലയിലെ വർധനവ് മൂലം മണ്ണിലെ മണ്ണിരകൾ ചത്തുപൊങ്ങുന്ന സാഹചര്യം പോലും ഉണ്ടായിട്ടുണ്ടെന്ന് പ്രദേശവാസികൾ പറഞ്ഞു. ഇത് മണ്ണിന്റെ സ്വാഭാവിക ഘടനയെയും കൃഷിയുടെ നിലനിൽപ്പിനെയും ബാധിക്കുന്ന ആശങ്കാജനകമായ സാഹചര്യമാണ്.
ഈ പ്രതിസന്ധി മറികടക്കാൻ, കാലാവസ്ഥാ വ്യതിയാനത്തെ അതിജീവിക്കുന്ന പ്രാദേശിക വികസന ഇടപെടലുകൾ അനിവാര്യമാണ്. പുൽപ്പള്ളി ഗ്രാമപഞ്ചായത്തിൽ നിലനിൽക്കുന്ന രൂക്ഷമായ മഴക്കുറവും താപനില വർധനവും കണക്കിലെടുത്ത്, പഞ്ചായത്തിനെ വരൾച്ചാബാധിത പ്രദേശമായി ഉടൻ പ്രഖ്യാപിക്കണമെന്നും കർഷകർക്ക് ആവശ്യമായ നഷ്ടപരിഹാരവും ജനങ്ങൾക്ക് കുടിവെള്ളവും കാലിത്തീറ്റയും ഉറപ്പാക്കാൻ സർക്കാർ അടിയന്തര നടപടികൾ സ്വീകരിക്കണമെന്നും ആവശ്യപ്പെട്ട് പഞ്ചായത്ത് സർക്കാരിന് നിവേദനം നൽകിയിട്ടുണ്ട്. ഇതിന് പിന്നാലെ തിരുനെല്ലി ഗ്രാമപഞ്ചായത്തും സമാനമായ ആവശ്യമുന്നയിച്ച് സർക്കാരിന് നിവേദനം നൽകിയിട്ടുണ്ട്. മുമ്പും സമാനമായ വരൾച്ചാ സാഹചര്യം നിലനിന്നപ്പോൾ തിരുനെല്ലി പഞ്ചായത്ത് ഇതുസംബന്ധിച്ച് പ്രമേയം പാസാക്കിയിരുന്നു.
നിലവിൽ വയനാട്ടിലുള്ള ജനകീയ കാലാവസ്ഥാ നിരീക്ഷണ സംവിധാനത്തിലൂടെ ശേഖരിക്കുന്ന ഈ ഹൈപ്പർ-ലോക്കൽ വിവരങ്ങൾ, പ്രദേശത്തെ സൂക്ഷ്മമായ കാലാവസ്ഥാ മാറ്റങ്ങളെയും പ്രാദേശിക തലത്തിലുള്ള പ്രശ്നങ്ങളെയും കൃത്യമായി മനസ്സിലാക്കാൻ വലിയ പിന്തുണയാണ് നൽകുന്നത്.
