പുൽപ്പള്ളി :പുൽപ്പള്ളി ടൗണിന്റെ തിരക്കുള്ള ഭാഗങ്ങളിലും വ്യാപാര സ്ഥാപനങ്ങൾക്ക് മുൻപിലും തെരുവോര കച്ചവടത്തിന് അനുമതി നൽകരുതെന്ന് കേരള വ്യാപാരി വ്യവസായി ഏകോപന സമിതി പുൽപ്പള്ളി യൂണിറ്റ് ഭരണസമിതി യോഗം ആവശ്യപ്പെട്ടു.
ടൗണിൽ കൃത്യമായി വാടകയും സെക്യൂരിറ്റിയും നൽകി, ലൈസൻസുകൾ, ഹെൽത്ത് കാർഡുകൾ എന്നിവയെടുത്ത്, സർക്കാരിലേക്ക് അടക്കേണ്ട എല്ലാ നികുതികളും വൈദ്യുതി ചാർജ്ജും അടച്ച് പ്രവർത്തിക്കുന്ന കടകളുടെ മുൻപിൽ തന്നെ തെരുവോര കച്ചവടം നടത്തുന്നത് ചെറുകിട-ഇടത്തരം കച്ചവടക്കാരുടെയും പഴം-പച്ചക്കറി വ്യാപാരികളുടെയും നിലനിൽപ്പിനെ ബാധിക്കുമെന്നും രൂക്ഷമായ ഗതാഗതക്കുരുക്കിന് ഇടയാക്കുമെന്നും യോഗം ചൂണ്ടിക്കാട്ടി.
ടൗണിന്റെ പല ഭാഗങ്ങളിലും തെരുവോര കച്ചവടം നിരോധിച്ചുകൊണ്ട് പഞ്ചായത്ത് സ്ഥാപിച്ചിട്ടുള്ള ബോർഡുകൾ നിലനിൽക്കെ വീണ്ടും അതിന് അനുമതി നൽകുന്നതിൽ വ്യാപാരികൾ ശക്തമായ പ്രതിഷേധം രേഖപ്പെടുത്തി.
ഉപജീവനത്തിനായി കച്ചവടം നടത്തുന്ന ചെറുകിട സ്ഥാപനങ്ങൾ തിങ്ങിനിറഞ്ഞ ടൗണിന്റെ പ്രധാന ഭാഗങ്ങൾ ഒഴിവാക്കി തെരുവോര കച്ചവടം നടത്തുന്നതിന് വ്യാപാരി സമൂഹം എതിരല്ല. അതിനാൽ തിരക്ക് കുറഞ്ഞ ഭാഗങ്ങളിലോ, പഞ്ചായത്തിന്റെ കൈവശമുള്ള സ്ഥലത്തോ അല്ലെങ്കിൽ പ്രത്യേക ഏരിയ കണ്ടെത്തിയോ നിയമപ്രകാരം തെരുവോര കച്ചവടക്കാരെ പുനരധിവസിപ്പിക്കാൻ അധികൃതർ തയ്യാറാകണം.
ഈ വിഷയത്തിൽ അടിയന്തര നടപടി ആവശ്യപ്പെട്ട് പഞ്ചായത്ത് പ്രസിഡന്റ്, സെക്രട്ടറി, ജില്ലാ കളക്ടർ, ആർ.ടി.ഒ, ഡെപ്യൂട്ടി ഡയറക്ടർ ഓഫ് പഞ്ചായത്ത്, പി.ഡബ്ല്യു.ഡി അസി. എക്സിക്യൂട്ടീവ് എൻജിനീയർ, ജില്ലാ പോലീസ് മേധാവി എന്നിവർക്ക് വ്യാപാരി ഏകോപന സമിതി പരാതി നൽകി.
യൂണിറ്റ് പ്രസിഡന്റ് മാത്യു മത്തായി ആതിരയുടെ അധ്യക്ഷതയിൽ ചേർന്ന യോഗത്തിൽ ജനറൽ സെക്രട്ടറി അജിമോൻ കെ.എസ് സ്വാഗതം പറഞ്ഞു. ഷാജിമോൻ പി.എ, ജോസ് കുന്നത്ത്, പി.എം.പൈലി, കെ. ജോസഫ്, ഇ.കെ.മുഹമ്മദ്, ബാബു രാജേഷ്, സജി വർഗീസ്, കെ.വി.റഫീഖ്, വേണുഗോപാൽ, പ്രഭാകരൻ, പ്രസന്നകുമാർ, എം.വി.ബാബു എന്നിവർ സംസാരിച്ചു.
