
നടവയൽ: വൈത്തിരി ഉപജില്ല കലാമേളയിൽ ഓവറോൾ ചാമ്പ്യൻഷിപ്പ് നേടിയ നടവയൽ സെന്റ് തോമസ് ഹയർ സെക്കൻഡറി സ്കൂൾ ടീം അംഗങ്ങൾക്ക് സ്വീകരണവും വിജയോത്സവവും നടത്തി. ഈ വർഷം വൈത്തിരി ഉപജില്ലയിലെ എല്ലാ മേളകളിലും നടവയൽ സെന്റ് തോമസ് ഹയർസെക്കൻഡറി സ്കൂളിനാണ് ചാമ്പ്യൻഷിപ്പ് ലഭിച്ചത്. ഉപജില്ല കായികോത്സവത്തിലും ശാസ്ത്രമേളയിലും കിരീടം നേടിയതിന്റെ തുടർച്ചയായാണ് സ്കൂൾ കലോത്സവത്തിന് ചാമ്പ്യൻഷിപ്പ് ലഭിച്ചത്. സ്കൂൾ ഓഡിറ്റോറിയത്തിൽ നടന്ന വിജയോത്സവം മാനന്തവാടി രൂപത കോർപ്പറേറ്റ് മാനേജർ റവ ഫാദർ സിജോ ഇളംകുന്നപ്പുഴ ഉദ്ഘാടനം നിർവഹിക്കുകയും വിജയികൾക്ക് ട്രോഫികൾ വിതരണം ചെയ്യുകയും ചെയ്തു. സ്കൂൾ മാനേജർ ആർച്ച് പ്രീസ്റ്റ് വിൻസന്റ് കളപ്പുരയിൽ അധ്യക്ഷത വഹിച്ചു. കണിയാമ്പറ്റ ഗ്രാമപഞ്ചായത്ത് അംഗം എം വിജയൻ, പ്രിൻസിപ്പൽ ജെയിംസ് പോൾ, പിടിഎ പ്രസിഡണ്ട് പ്രിൻസ് ജോസഫ്, പ്രധാന അധ്യാപകൻ കെ ജെ ബിജു എന്നിവർ സംസാരിച്ചു. തുടർന്ന് നടന്ന വിജയ ഘോഷയാത്രയ്ക്ക് ജെൻടി പോൾ, സിസ്റ്റർ പി വി സിനി, അർജുൻ തോമസ് എന്നിവർ നേതൃത്വം നൽകി.








