*പാടിയാർട്ടിന്റെ പന്ത്രണ്ടാമത്തെ ചിത്രം; നെല്ലും വയലും ജലവും സംരക്ഷിക്കാനുള്ള സന്ദേശം*
*സി.ഡി. സുനീഷ്*
*ബത്തേരി നെൽച്ചെടികളുടെ നിറവ്യത്യാസങ്ങൾ ഉപയോഗിച്ച് രാഷ്ട്രപതി ദ്രൗപദി മുർമുവിന്റെ മുഖചിത്രം ഒരുക്കി വയനാട്ടിലെ പാടിയാർട്ട് ശ്രദ്ധേയമാകുന്നു. ബത്തേരിക്കടുത്ത നമ്പിക്കൊല്ലിയിലെ പ്രസീദിന്റെ പാടത്താണ് വേറിട്ട കലാവിഷ്കാരം ഒരുക്കിയത്.
വയലറ്റ് നിറഭേദങ്ങളുള്ള കാലാബത്തി, നസാർ ബാത്ത്, ആത്മീക, പച്ച നിറഭേദങ്ങളുള്ള കൃഷ്ണകൗമോദ്, ജീരകശാല, ഗന്ധകശാല, ഡാബർഷാല തുടങ്ങിയ നെല്ലിനങ്ങളാണ് ചിത്രത്തിനായി ഉപയോഗിച്ചത്. പാടിയാർട്ട് പരമ്പരയിലെ പന്ത്രണ്ടാമത്തെ ചിത്രമാണിത്.
ഇന്ത്യയുടെ ഭൂപടം, ബുദ്ധൻ, ക്രിസ്തു, മക്ക–മദീന, ഓണപ്പൂക്കളം, ഗരുഡൻ, സ്വാമി വിവേകാനന്ദൻ, ഗുരുവായൂർ കേശവൻ, ആദിയോഗി, നരേന്ദ്ര മോദി തുടങ്ങിയ ചിത്രങ്ങളും മുൻപ് വയലിൽ ഒരുക്കിയിട്ടുണ്ട്. ബത്തേരിയിലെ ചിത്രകാരന്മാരായ എ. വൺ പ്രസാദ്, പ്രമോദ്, ദീദി എന്നിവരാണ് ചിത്രരചനയ്ക്ക് നേതൃത്വം നൽകിയത്.
2023-ൽ മികച്ച കർഷകനുള്ള ദേശീയ സസ്യജനിതക പുരസ്കാരം രാഷ്ട്രപതിയിൽനിന്ന് പ്രസീദിന് ലഭിച്ചിരുന്നു. പരമ്പരാഗത നെൽവിത്തുകളുടെ സംരക്ഷണത്തിനും വയലുകളുടെ പാരിസ്ഥിതിക പ്രാധാന്യം ജനങ്ങളിലെത്തിക്കാനുമാണ് പാടിയാർട്ടിലൂടെ ശ്രമിക്കുന്നതെന്ന് തയ്യിൽ പ്രസാദ് പറഞ്ഞു. നെല്ലും വയലും ജലവും സംരക്ഷിക്കണമെന്ന സന്ദേശമാണ് ഈ കലാവിഷ്കാരം മുന്നോട്ടുവയ്ക്കുന്നത്.
