10 ലക്ഷം വരെ സാമ്പത്തിക സഹായം
പട്ടികജാതി വിഭാഗക്കാരായ വനിതകൾക്ക് സ്വയം തൊഴിൽ സാധ്യതകൾ കണ്ടെത്തി സാമ്പത്തിക സ്വയംപര്യാപ്തത കൈവരിക്കാൻ പിന്തുണയേകി സംസ്ഥാന സർക്കാരിന്റെ ദാക്ഷായണി പദ്ധതി. സ്റ്റാർട്ടപ്പ്, നവീന സാങ്കേതികവിദ്യ, സേവന-ഉത്പാദന-കാർഷിക അനുബന്ധ മേഖലകളിൽ വനിതകളുടെ പങ്കാളിത്തം ഉറപ്പാക്കി സ്ഥിര വരുമാനമാർഗ്ഗം സൃഷ്ടിക്കുകയാണ് പദ്ധതി ലക്ഷ്യം. പദ്ധതിപ്രകാരം കുറഞ്ഞത് അഞ്ച് വനിതകൾ ഉൾപ്പെടുന്ന സ്വയംസഹായ സംഘങ്ങൾക്ക് നൂതന സംരംഭങ്ങൾ ആരംഭിക്കാൻ അംഗീകൃത പദ്ധതിച്ചെലവിന്റെ 75 ശതമാനം വരെ പരമാവധി 10 ലക്ഷം രൂപയും വ്യക്തിഗത സംരംഭങ്ങളുടെ വിപുലീകരണത്തിന് പദ്ധതി ചെലവിന്റെ 75 ശതമാനം വരെ പരമാവധി 3.75 ലക്ഷം രൂപയും സഹായമായി അനുവദിക്കും. പട്ടികജാതി വിഭാഗത്തിലെ സാമ്പത്തികമായി പിന്നാക്കം നിൽകുന്ന കുടുംബങ്ങൾ, അവിവാഹിതരായ അമ്മമാർ, വിധവകളായ വനിതകൾ എന്നിവർക്കും സർക്കാർ ഏജൻസികൾ മുഖേന വിവിധ നൈപുണി വികസന പരിപാടികളിൽ പങ്കെടുത്ത് വിജയകരമായി പരിശീലനം പൂർത്തിയാക്കിയവർക്കും പദ്ധതിയിൽ മുൻഗണന ലഭിക്കും.
ഇരുപത്തൊന്ന് വയസ് പൂർത്തിയായതും 55 കവിയാത്ത വനിതകൾക്കായാണ് പദ്ധതി വിഭാവനം ചെയ്തത്. പദ്ധതി ആനുകൂല്യത്തിനായി സംരംഭത്തിന്റെ വിശദാംശങ്ങൾ, ആവശ്യമായ രേഖകൾ സഹിതം ബന്ധപ്പെട്ട പട്ടികജാതി വികസന ഓഫീസിൽ അപേക്ഷ നൽകണം. അപേക്ഷകരുടെ കുടുംബ വാർഷിക വരുമാനം അഞ്ച് ലക്ഷത്തിൽ അധികരിക്കരുത്. അപേക്ഷകർ ഏഴാം ക്ലാസ് വിജയിച്ചിരിക്കണം. സംഘത്തിന്റെ രജിസ്ട്രേഷൻ, അംഗങ്ങളുടെ യോഗ്യത, മറ്റ് രേഖകളുടെ വിശദവിവരങ്ങൾ അതത് ജില്ലാ പട്ടികജാതി വികസന ഓഫീസുകളിൽ നിന്നും ലഭിക്കും. സംരംഭങ്ങൾ ആരംഭിക്കുന്നതിനാവശ്യമായ പരിശീലനം, സോഫ്റ്റ് സ്‌കിൽ, കമ്പ്യൂട്ടർ പരിശീലനം, സാമ്പത്തിക സാക്ഷരത എന്നിവ പദ്ധതിയുടെ ഭാഗമായി ലഭ്യമാക്കും. പദ്ധതി ആനുകൂല്യങ്ങൾ അർഹരായവർക്ക് ഉറപ്പാക്കുന്നതിന് ജില്ലാ തലത്തിൽ നിർവഹണ സമിതി രൂപീകരിച്ച് പദ്ധതി നിർവഹണം കാര്യക്ഷമമാക്കും.
