
കൽപ്പറ്റ: പുത്തൂർവയൽ പിയോഭവൻ ധ്യാനകേന്ദ്രത്തിൽ പതിനാറാം വാർഷികവും വിശുദ്ധ പാദ്രേ പിയോയുടെ തിരുനാളും നാളെ(വ്യാഴം) ആഘോഷിക്കുമെന്ന് ഡയറക്ടർ ഫാ.സെബാസ്റ്റ്യൻ കാക്കരിയിൽ ഒഎഫ്എം, സെക്രട്ടറി പി.സി. സോജൻ എന്നിവർ വാർത്താസമ്മേളനത്തിൽ അറിയിച്ചു. രാവിലെ ഒമ്പതിന് ഒരുക്ക ശുശ്രൂഷ, ജപമാല, പ്രസുദേന്തിമാരെ വാഴിക്കൽ എന്നിവ നടത്തും. 10.30ന് സെന്റ് ഫ്രാൻസിസ് ഓഫ് അസീസി കപ്പുച്ചിൻ പ്രൊവിൻസ്, കേരള പ്രൊവിൻഷ്യൻ മിനിസ്റ്റർ ഫാ.ഡോ.സ്റ്റാലിൻ വർഗീസ് ഒഎഫ്എമ്മിനും വൈദികർക്കും സ്വീകരണം. 10.45ന് പ്രൊവിൻഷ്യൽ മിനിസ്റ്ററുടെ മുഖ്യകാർമികത്വത്തിൽ ആഘോഷമായ കൃതജ്ഞതാബലി. സന്ദേശം: ഫാ.ഡോ.റോബിൻ ഡാനിയേൽ(സെന്റ് ഫ്രാൻസിസ് അസീസി കപ്പുച്ചിൻ പ്രൊവിൻസ്, കേരള). ഉച്ചയ്ക്ക് 1.30ന് സ്നേഹവിരുന്ന്. രണ്ടിന് കൈകെട്ടിയ ഈശോയോടുള്ള നൊവേന. 2.30ന് ആരാധന, അടയാള പ്രാർഥന, തൈലാഭിഷേകം. പിയോ ഭവനിൽ എല്ലാ വ്യാഴാഴ്ചയും ധ്യാനവും തിങ്കൾ, ചൊവ്വ ദിവസങ്ങളിൽ സ്പിരിച്വൽ ഷെയറിംഗും ഉണ്ടാകുമെന്നും ഡയറക്ടർ പറഞ്ഞു.








