കൽപ്പറ്റ: വയനാട്ടിൽ പേവിഷ പ്രതിരോധ കുത്തിവയ്പ്പിന് വിധേയമാക്കന്ന നായകളുടെ എണ്ണത്തിൽ വർധന. 2024-25ൽ 8,494 വളർത്തുനായകളെയും 1,201 തെരുവുനായകളയെമാണ് വാക്‌സിനേഷന് വിധേയമാക്കിയത്. 2025-26ൽ ഇത് യഥാക്രമം 9,889 ഉം 3239 ഉം ആയി വർധിച്ചു. ഈ വർഷം ഇതുവരെ 4,300 വളർത്തുനായകൾക്കും 1,820 തെരുവുനായക്കൾക്കും കുത്തിവയ്പ്പ് നൽകി.
പേവിഷ പ്രതിരോധത്തിന് വാർഷിക കുത്തിവയ്പ്പാണ് പോംവഴിയെന്ന് ജില്ലാ മൃഗസംരക്ഷണ ഓഫിസർ ഡോ.ആർ. അജി പറഞ്ഞു. വീടുകളിൽ കുടുംബാംഗങ്ങളുമായി അടുത്തുകഴിയുന്ന വളർത്തുനായകൾക്കും പൂച്ചകൾക്കും പ്രതിരോധ കുത്തിവയ്പ് അത്യന്താപേക്ഷിതമാണ്.
നായയുടെ കടിയേറ്റാൽ ഉടൻ കടിയേറ്റ ഭാഗം മുഴുവൻ 15 മിനിറ്റോളം വെള്ളവും സോപ്പും ഉപയോഗിച്ച് കഴുകണം. മുറിവിലുള്ള വൈറസിനെ നീക്കാനും നശിപ്പിക്കുവാനും ഇത് സഹായിക്കും. അതിനുശേഷം അടുത്തുള്ള ആരോഗ്യകേന്ദ്രത്തിൽ എത്തി ഡോക്ടറുടെ നിർദേശപ്രകാരം പ്രതിരോധ കുത്തിവയ്പ്പും മറ്റു ചികിത്സകളും സ്വീകരിക്കണം. പേവിഷ പ്രതിരോധ കുത്തിവയ്പ്പിന് വിധേയമാക്കിയ പട്ടിയും പൂച്ചയും കടിക്കുകയോ മാന്തുകയോ ചെയ്താലും പ്രതിരോധ വാക്‌സിൻ എടുക്കണം.
സ്വഭാവത്തിന് പെട്ടെന്നുള്ള മാറ്റം, അമിതമായ രീതിയിൽ ഉമിനീരൊഴുക്ക്, വെള്ളം നക്കിക്കുടിക്കാനുള്ള ബുദ്ധിമുട്ട്, ഭക്ഷണം കഴിക്കാനുള്ള പ്രയാസം, അസാധാരണമായ ശബ്ദപ്രകടനങ്ങൾ, അമിതമായ അക്രമണ സ്വഭാവം, തളർച്ച, നടക്കുന്നതിൽ ഏകോപനമില്ലായ്മ, ശരീരത്തിന്റെ പിൻഭാഗത്തിനും കാലുകൾക്കും തളർച്ച എന്നിവ നായ്ക്കളിലെയും പൂച്ചകളിലെയും പേവിഷ ബാധ ലക്ഷണങ്ങളാണ്.
