പിലാക്കാവ്: സെന്റ് ജോസഫ്‌സ് എൽ.പി. സ്കൂൾ പിലാക്കാവിൽ അലിഫ് അറബിക് ക്ലബ്ബിന്റെ ആഭിമുഖ്യത്തിൽ അന്താരാഷ്ട്ര അറബിക് ഭാഷാദിനാചരണത്തിന്റെ പ്രചാരണോൽഘാടനം നടത്തി.
സ്കൂൾ ഹെഡ്മാസ്റ്റർ വിപിൻ സേവ്യർ പരിപാടിയുടെ പ്രഖ്യാപനം നിർവഹിച്ചു. അലിഫ് അറബിക് ക്ലബ് കൺവീനർ നൗഷാദ് കാക്കവയൽ ഭാഷാദിനാചരണത്തിന്റെ ഭാഗമായി അടുത്ത രണ്ടു മാസത്തേക്ക് നടത്താനുദ്ദേശിക്കുന്ന വിവിധ പ്രവർത്തനങ്ങളുടെ പദ്ധതി വിശദീകരിച്ചു.
വിദ്യാർഥികളിൽ അറബി ഭാഷാപഠനത്തോടുള്ള താൽപര്യം വർധിപ്പിക്കുക, അറബി ഭാഷയുടെ പ്രാധാന്യം തിരിച്ചറിയുക, ഭാഷാപരമായ കഴിവുകളും സർഗാത്മകശേഷികളും വികസിപ്പിക്കുക എന്നിവ ലക്ഷ്യമിട്ടുള്ള വിവിധ പരിപാടികളാണ് ആസൂത്രണം ചെയ്തിരിക്കുന്നത്.
അറബിയിൽ സ്വയം പരിചയപ്പെടുത്തൽ, ചിത്രരചന, പോസ്റ്റർ നിർമാണം തുടങ്ങി വിദ്യാർഥികളുടെ പങ്കാളിത്തം ഉറപ്പാക്കുന്ന വൈവിധ്യമാർന്ന പ്രവർത്തനങ്ങൾ ഭാഷാദിനാചരണത്തിന്റെ ഭാഗമായി സംഘടിപ്പിക്കും.
