വോട്ടർപട്ടികയുടെ സ്പെഷ്യൽ സമ്മറി റിവിഷൻ (2027) നടപടികളുടെ ഭാഗമായുള്ള കരട് വോട്ടർപട്ടിക പ്രസിദ്ധീകരിച്ചു. ജില്ലാ കരട് പട്ടിക പ്രകാരം ജില്ലയിൽ ആകെ 646722 വോട്ടർമാരാണുള്ളത്. ഇതിൽ 330652 സ്ത്രീകളും 316066 പുരുഷന്മാരും നാല് ട്രാൻസ്ജെൻഡർ വോട്ടർമാരും ഉൾപ്പെടുന്നു. പോളിംഗ് സ്റ്റേഷനുകളുടെ പുനഃക്രമീകരണത്തിന്റെ ഭാഗമായി കൽപ്പറ്റ, മാനന്തവാടി മണ്ഡലങ്ങളിലായി രണ്ട് പുതിയ പോളിംഗ് സ്റ്റേഷനുകൾ കൂടി ഒരുക്കിയിട്ടുണ്ട്. ഇതോടെ ജില്ലയിലെ ആകെ പോളിംഗ് സ്റ്റേഷനുകളുടെ എണ്ണം 717 ആയി ഉയർന്നു. കരട് വോട്ടർപട്ടിക സംബന്ധിച്ച ആക്ഷേപങ്ങളും അവകാശവാദങ്ങളും 2026 ഡിസംബർ 11 വരെ സമർപ്പിക്കാം. തുടർന്നുള്ള പരിശോധനകൾക്ക് ശേഷം അന്തിമ വോട്ടർപട്ടിക 2027 ജനുവരി നാലിന് പ്രസിദ്ധീകരിക്കും.
തിരഞ്ഞെടുപ്പ് ഓഫീസറായ ജില്ലാ കളക്ടർ വി. ചെൽസാസിനിയുടെ അധ്യക്ഷതയിൽ കളക്ടറേറ്റിൽ നടന്ന തിരഞ്ഞെടുപ്പ് ഉദ്യോഗസ്ഥരുടെ യോഗത്തിൽ വോട്ടർപട്ടിക സംബന്ധിച്ച പ്രവർത്തനങ്ങൾ വിലയിരുത്തി. തുടർ നടപടികൾക്കുള്ള മാർഗ്ഗ നിർദ്ദേശങ്ങൾ ജില്ലാ കളക്ടർ ഉദ്യോഗസ്ഥർക്ക് നൽകി. ഇലക്ഷൻ ഡെപ്യൂട്ടി കളക്ടർ സി. ബിജു, ഇ ആർ ഒ മാരായ കെ.മനോജ് കുമാർ, ഇ. സുരേഷ് ബാബു, എ ഇ ആർ ഒ മാരായ എം.സി രാകേഷ്, ജോബി ജെയിംസ്, ശിവദാസൻ, കെ.ബി വിനോദ് തുടങ്ങിയവർ പങ്കെടുത്തു.
