ദീപാവലി കഴിഞ്ഞ് വരുന്ന അമാവാസിയുടെ പിറ്റേന്ന് വടക്കേ ഇന്ത്യയിൽ ഗോവർദ്ധന പൂജയായി ആഘോഷിക്കുമ്പോൾ, അയൽസംസ്ഥാനമായ കർണ്ണാടകയുടെ ചില ഭാഗങ്ങളിൽ ഇത് മഹാബലി ചക്രവർത്തിയുടെ ഭൂമിയിലേക്കുള്ള തിരിച്ചുവരവിന്റെ ഓർമ്മ പുതുക്കലാണ്.
കർണ്ണാടകയിലെ ചിത്രദുർഗ്ഗയിലും കബനി നദിക്കരയിലെ ബൈരക്കുപ്പയിലും ചില ഗോത്രവിഭാഗങ്ങൾ അവരുടെ പ്രധാന ദീപാവലിയായും ഈ ദിവസം കൊണ്ടാടുന്നു.
തെക്കും വടക്കും പല രൂപങ്ങളിലാണ് അനുഷ്ഠാനങ്ങളെങ്കിലും ആഘോഷങ്ങളുടെ പ്രധാന ഇതിവൃത്തം കാർഷിക സമൃദ്ധിയും കന്നുകാലി സമ്പത്തിന്റെ വർദ്ധനവുമാണ്.
അനുഷ്ഠാനങ്ങളിലെ വൈവിധ്യം:
* വടക്കേ ഇന്ത്യ: വീട്ടുപടിക്കൽ ചാണകം കൊണ്ട് ഗോവർദ്ധന പർവ്വതത്തിന്റെ മാതൃകകൾ ഉണ്ടാക്കി ഭംഗിയായി അലങ്കരിച്ചാണ് പൂജ നടത്തുന്നത്. ഭഗവാന് ‘അന്നകൂട്’ എന്ന പേരിൽ 56 സസ്യവിഭവങ്ങൾ അടങ്ങിയ നിവേദ്യവും തുടർന്ന് ഗംഭീര സദ്യയും ഒരുക്കുന്നു.
മണ്ണുകൊണ്ടോ ചാണകം ഉപയോഗിച്ചോ മഹാബലി ചക്രവർത്തിയുടെ രൂപമോ കോട്ടയുടെ മാതൃകയോ നിർമ്മിച്ച് പൂജ നടത്തുന്നു. മഹാബലി തമ്പുരാന്റെ വരവറിയിച്ചുള്ള വിഭവസമൃദ്ധമായ സസ്യസദ്യയും കർണ്ണാടകയുടെ പ്രത്യേകതയാണ്.
കന്നുകാലി സമ്പത്തിന് ആദരം:
കാർഷിക സമൃദ്ധിയുടേയും കന്നുകാലി സമ്പത്തിന്റെയും പ്രതീകമായി എല്ലായിടത്തും കന്നുകാലികളെ കുളിപ്പിച്ച് അണിയിച്ചൊരുക്കി, കൊമ്പുകളിൽ ചായം തേച്ച് പ്രത്യേക പൂജകൾ നടത്തുന്നു.
ബൈരക്കുപ്പയിലെ ‘മൂരിയബ്ബ’:
ചിത്രദുർഗ്ഗയിലും ബൈരക്കുപ്പയിലും വേടഗൗഡർ, ഉരിദാവർ തുടങ്ങിയ ഗോത്രവിഭാഗങ്ങളാണ് ദീപാവലി ആഘോഷത്തിന്റെ ഭാഗമായി ഈ ചടങ്ങുകൾ നടത്തുന്നത്. വിളവെടുപ്പ് കഴിഞ്ഞ കാർഷിക വിളകൾ ക്ഷേത്രങ്ങളിൽ കാഴ്ചയായി സമർപ്പിക്കുന്ന ഇവർ, കാളകളെ കുളിപ്പിച്ച് ചമയങ്ങൾ ചാർത്തി ആരതി ഉഴിയുന്നു.
തുടർന്ന് വാദ്യമേളങ്ങളുടെ അകമ്പടിയോടെ ക്ഷേത്രാങ്കണങ്ങളിലെത്തിച്ച ശേഷം ചെണ്ടമേളങ്ങളുടെയും കാതടപ്പിക്കുന്ന കരിമരുന്ന് പ്രയോഗങ്ങളുടെയും അകമ്പടിയോടെ കാളകളെ കൂട്ടത്തോടെ ഓടിക്കുന്നതാണ് ‘മൂരി ചാട്ടം’ അഥവാ ‘മൂരിയബ്ബ’ എന്ന ആഘോഷം.
ആസേതു ഹിമാലയം നിലനിൽക്കുന്ന സാംസ്കാരിക അന്തർധാരയും ഐക്യവുമാണ് വ്യത്യസ്ത ആചാരങ്ങളിലൂടെ ദീപാവലിയുമായി ബന്ധപ്പെട്ട ഈ ആഘോഷങ്ങൾ വിളിച്ചോതുന്നത്.
