സുരക്ഷാ 2023 പദ്ധതി പൂർത്തീകരിച്ചു

പടിഞ്ഞാറത്തറ, മൂപ്പൈനാട് പഞ്ചായത്തുകൾ സുരക്ഷാ 2023 പദ്ധതി പൂർത്തീകരിച്ചു. പഞ്ചായത്തുകളിലെ അർഹരായ മുഴുവൻ കുടുംബങ്ങളെയും പ്രധാനമന്ത്രി സുരക്ഷാ ഭീമായോജനാ പദ്ധതിയിൽ ഉൾപ്പെടുത്തി. പടിഞ്ഞാറത്തറ ഗ്രാമ പഞ്ചായത്തിൽ നടന്ന യോഗത്തിൽ പഞ്ചായത്ത് വൈസ് പ്രസിഡന്റ് ഗിരിജാ കൃഷ്ണനും, മൂപ്പൈനാട് ഗ്രാമ പഞ്ചായത്തിൽ നടന്ന യോഗത്തിൽ ഗ്രാമപഞ്ചായത്ത് പ്രസിഡന്റ് ഇ.വി.ശശിധരനും സുരക്ഷാ 2023 ക്യാമ്പെയിനിന്റെ പൂർത്തീകരണ പ്രഖ്യാപനം നടത്തി. ജില്ലയിലെ അർഹരായ മുഴുവൻ ആളുകളെയും കേന്ദ്ര സർക്കാരിന്റെ സുരക്ഷാപദ്ധതികളിൽ ഉൾപ്പെടുത്തുക എന്ന ലക്ഷ്യത്തോടെ ജില്ലാ ഭരണകൂടത്തിന്റെയും ഭാരതീയ റിസർവ് ബാങ്കിന്റെയും നബാർഡിന്റെയും സംയുക്ത ആഭിമുഖ്യത്തിൽ ലീഡ് ബാങ്ക് നടപ്പിലാക്കുന്ന ക്യാമ്പെയിനാണ് സുരക്ഷ 2023. സുരക്ഷാ 2023 ക്യാമ്പയിന് പിന്നിൽ പ്രവർത്തിച്ച വാർഡ് മെമ്പർമാരെയും കുടുംബശ്രീ സി ഡി എ സ് , എ.ഡി.എ.സ് പ്രവർത്തകരെയും ലീഡ് ബാങ്ക് മാനേജർ ബിബിൻ മോഹൻ, നബാർഡ് ജില്ലാ ഓഫീസർ വി. ജിഷ, എന്നിവർ പുരസ്‌കാരം നൽകി ആദരിച്ചു. പടിഞ്ഞാറത്തറ കാനറാ ബാങ്ക് മാനേജർ നേഹ, കേരള ബാങ്ക് മാനേജർമാരായ അഷറഫ്, രാജേഷ്, സ്റ്റേറ്റ് ബാങ്ക് ഓഫ് ഇന്ത്യ മാനേജർ അരുൺ, സാമ്പത്തിക സാക്ഷരതാ കൗൺസിലർമാരായ കെ.സിന്ധു , കെ.ശശിധരൻ തുടങ്ങിയവർ സംസാരിച്ചു.