ജനകീയമായി അദാലത്ത്; കൈകൾ കോർത്ത് വകുപ്പുകൾ

മൂന്ന് ദിവസങ്ങളിൽ ജില്ലയിൽ തുടർച്ചയായി നടന്ന കൈകൾ കോർത്ത് കരുത്തോടെ അദാലത്ത് വിവിധ വകുപ്പുകൾ കൈകൾ കോർത്ത് പരാതി പരിഹാരം എളുപ്പമാക്കി. ഒരു വേദിയിൽ തന്നെ വിവിധ വകുപ്പുകൾ ചേർന്നെടുക്കേണ്ട തീരുമാനങ്ങൾ വേഗതയിൽ മുന്നേറിയപ്പോൾ കെട്ടഴിഞ്ഞത് നൂലാമാലകളുടെ ചുവപ്പുനാടകളായിരുന്നു. ഇതര വകുപ്പുകളുമായി ചേർന്ന തീരുമാനമെടുക്കേണ്ട പരാതികളിൽ അദാലത്ത് വേദിയിൽ നിന്നു തന്നെ പരിഹാരം കാണുകയായിരുന്നു ലക്ഷ്യം. ജില്ലാ കളക്ടർ ഡോ. രേണുരാജിന്റെ നേതൃത്വത്തിൽ അദാലത്ത് വേദികളിലെല്ലാം വിവിധ വകുപ്പുകളുടെ പ്രത്യേക കൗണ്ടറുകൾ സജ്ജമാക്കിയിരുന്നു. എല്ലാവിധ പരാതികൾക്കും താമസമില്ലാതെ പരിഹാരം കാണാനുളള പരിശ്രമങ്ങൾ അധികൃതരുടെ ഭാഗത്ത് നിന്നുമുണ്ടായപ്പോൾ അദാലത്തിലെത്തിയവർക്കും കാത്തിരുന്നു വലയാതെ പരാതി പരിഹാരത്തിനുള്ള അവസരമായി. റേഷൻ കാർഡ് തരം മാറ്റൽ തുടങ്ങിയ അപേക്ഷകളിൽ പുതിയ റേഷൻ കാർഡുകൾ വേദിയിൽ നിന്നു തന്നെ പ്രിന്റ് ചെയ്ത് നൽകാനുള്ള സൗകര്യങ്ങൾ ഏർപ്പെടുത്തിയിരുന്നു. എ.ഡി.എം എൻ.ഐ. ഷാജു, ഡെപ്യൂട്ടി കളക്ടർമാരായ കെ. അജീഷ്, വി. അബൂബക്കർ, കെ. ദേവകി, തദ്ദേശ സ്വയംഭരണവകുപ്പ് ജോയിന്റ് ഡയറക്ടർ ഷാജി ജോസഫ് ചെറുകരക്കുന്നേൽ തുടങ്ങിയവർ അദാലത്തിലെ പ്രത്യേക സേവന കൗണ്ടറുകളുടെ പ്രവർത്തനം ഏകോപിപ്പിച്ചു. വിവിധ വകുപ്പ് ജീവനക്കാർ, എൻ.സി.സി, സ്റ്റുഡന്റ് പോലീസ് കേഡറ്റുകൾ തുടങ്ങിയവർ അദാലത്തിൽ കർമ്മനിരതരായി. വളണ്ടിയറായി പ്രവർത്തിച്ചവർക്കുള്ള സർട്ടിഫിക്കറ്റുകളും ചടങ്ങിൽ വിതരണം ചെയ്തു.