ഡി.വൈ.എഫ്‌.ഐ ജില്ലാ യൂത്ത്മാർച്ച് ഇന്ന് (ഏപ്രിൽ 30) സമാപിക്കും. എ എ റഹീം ഉദ്ഘാടനം ചെയ്യും

കൽപ്പറ്റ: “യുവജനങ്ങളെ വഞ്ചിക്കുന്ന കേന്ദ്ര സർക്കാർ, വയനാടിനെ വഞ്ചിക്കുന്ന യു.ഡി.എഫ് ജനപ്രതിനിധികൾ” എന്ന മുദ്രാവാക്യമുയർത്തി ഡി.വൈ.എഫ്‌.ഐ ജില്ലാ കമ്മിറ്റി സംഘടിപ്പിക്കുന്ന യൂത്ത് മാർച്ചിന്റെ അഞ്ചാം ദിവസത്തെ പര്യടനം പൂർത്തിയാക്കി. യൂത്ത് മാർച്ച് ഇന്ന് (ഏപ്രിൽ30) സമാപിക്കും. ജില്ലാ സെക്രട്ടറി കെ റഫീഖാണ് ജാഥാ ക്യാപ്റ്റൻ. ജില്ലാ പ്രസിഡന്റ് കെ എം ഫ്രാൻസിസ് മാനേജരും സംസ്ഥാന കമ്മിറ്റി അംഗം ഷിജി ഷിബു വൈസ് ക്യാപ്റ്റനുമാണ്.
യൂത്ത് മാർച്ചിന്റെ അഞ്ചാം ദിനത്തെ പര്യടനം പാടിച്ചിറയിൽ സിപിഐഎം സംസ്ഥാന കമ്മിറ്റി അംഗം സി കെ ശശീന്ദ്രൻ ഉദ്ഘാടനം ചെയ്തു. ധീരരക്ത സാക്ഷി രവിയുടെ മാതാവ് ദേവകിയമ്മ വേദിയിലെത്തി. രവി – ശശി രക്തസാക്ഷികളുടെ സ്മൃതി മണ്ഡലത്തിൽ പുഷ്പാർച്ചന നടത്തിയാണ് പര്യടനം ആരംഭിച്ചത്.
തുടർന്ന് മുള്ളൻകൊല്ലി, പുൽപ്പള്ളി എന്നീ കേന്ദ്രങ്ങളിലെ സ്വീകരണങ്ങൾക്ക് ശേഷം ഇരുളത്ത് സമാപിച്ചു. സമാപന പൊതുയോഗം വി എൻ ഉണ്ണികൃഷ്ണൻ ഉദ്ഘാടനം ചെയ്തു. വിവിധ സ്വീകരണ കേന്ദ്രങ്ങളിൽ ജാഥാ ക്യാപ്റ്റൻ കെ റഫീഖ്, വൈസ് ക്യാപ്റ്റൻ ഷിജി ഷിബു, മാനേജർ കെ എം ഫ്രാൻസിസ് , ഡിവൈഎഫ്ഐ ജില്ലാ ട്രഷറർ കെ ആർ ജിതിൻ, ജില്ലാ ജോയിൻറ് സെക്രട്ടറി എം രമേഷ്, ജില്ലാ സെക്രട്ടറിയേറ്റംഗം പി ജംഷീദ് എന്നിവർ സംസാരിച്ചു. ജാഥാ സമാപന ദിവസമായ 30 ന് രാവിലെ ഒമ്പതിന്‌ മൂലങ്കാവിൽ നിന്ന് പ്രയാണമാരംഭിക്കും. സിപിഐഎം സംസ്ഥാന കമ്മിറ്റി അംഗം ഓ ആർ കേളു എംഎൽഎ ഉദ്‌ഘാടനം ചെയ്യും. ജാഥാ സമാപനം മീനങ്ങാടിയിൽ അഖിലേന്ത്യാ പ്രസിഡണ്ട് എ എ റഹീം ഉദ്ഘാടനം ചെയ്യും.